Clube Deportivo Ourense terá mañá unha proba de fogo ante un dos galiños da Segunda B para demostrar que o seu bo facer na segunda volta nom está sendo froito da casualidade. Ademais, o Ourense dende a chegada de Tomé conta os partidos na casa por victorias, e tentará prolonga-la racha con vistas a achegarse máis á salvación matemática e a unha hipotética clasificación para a Copa.O mazazo que supuxo a eliminación da Copa Federación o pasado mércores pola inxección que suporía chegar á final, pode aliviarse cunha nova victoria na casa ante o Las Palmas, que incrementaría a tranquilidade do Ourense na taboa clasificatoria.

O Ourense perde para este partido ao xogador revelación desta segunda volta, Oscar Martínez, que estaba a marcar goles moi importantes, como o que supuxo a victoria o pasado domingo en Lanzarote.Esta baixa únese ás xa sabidas de Manuel Ángel e Rubén Durán.Así un posible once sería o seguinte: Moncho; Seoane,Pablo, Aloisio, Dacosta; Anxo ou Xaime, Currás, Sanromán, David; Padín e Sueiro.

Pero o Ourense nom o terá fácil ante un dos claros aspirantes ao ascenso á Segunda A por historial e presuposto, aínda que o seu xogo nas últimas xornadas dista moito doo que se esperaba. Ante esa crise de xogo, a directiva cesou ao anterior adestrador, Visjnic, e puxo momentáneamente o cargo a disposición do director deportivo Juanito. Os amarelos chegan a Ourense coas baixas de: Nacho Casanova, Xavi Martel e Monteagudo.

Como dato curioso dicir que o Las Palmas nunca gañou no Couto,obtendo 3 victorias e dous empates o Ourense nos enfrontamentos entre os dous equipos tanto en Segunda A coma na B.

O partido será ás 18,30 porque será televisado para a Televisión Canaria. Será arbitrado por González González.

-----------------------------------------------------------------

Ás 16,00 o Ourense B xogará en Oira ante o primeiro clasificado da Rexional Preferente no grupo Sur, o Cruceiro Hío.